మీ పాత్రలు మా జీవితాన్ని మార్చాయి!

గౌరవనీయులైన రచయిత గారికి,

నేను రంజీత్‌ని.

మీతో మనస్ఫూర్తిగా మాట్లాడాలని చాలా రోజులుగా అనుకుంటూ ఉన్నాను. ఇది ప్రతిలిపి CEOగా లేదా అధికారి‌గా రాస్తున్న లేఖ కాదు. నా కలకు, ముందుచూపుకు మూలకారణమైన రచయితలకు ఋణపడి ఉన్న ఒక సాధారణ వ్యక్తిగా రాస్తున్న నా గుండెల్లోని మాటలివి.

భాష, సాంకేతికత, ప్రాంత పరిమితులు వంటి ఏ అడ్డంకులు లేకుండా — ఏ రచయిత అయినా తమ రచనలను ప్రపంచంతో పంచుకోగలిగే ఒక గొప్ప వేదికను నిర్మించాలన్నదే నా కల.

బెంగళూరులో ఐదుగురు కలిసి ప్రతిలిపిని ప్రారంభించిన ఆ చిన్న ఇల్లు నాకిప్పటికీ గుర్తుంది. అప్పట్లో మమ్మల్ని ఎవరూ గుర్తించలేదు. మా వద్ద గొప్ప సాంకేతిక వనరులూ లేవు, ఆర్థికబలం కూడా లేదు. అయినా రచయితలైన మీరు మాతో కలిసి నడవడానికి నమ్మకంతో ముందుకొచ్చారు!

ఇంకా నడక నేర్చుకుంటున్న మన వేదికకు, మీరు మీ గొప్ప సాహిత్యాన్ని ప్రేమతో అందించారు.

గత 11 సంవత్సరాల ప్రయాణంలో అనేక కష్టకాలాలు ఎదురయ్యాయి. ఇక ముందుకు వెళ్లలేక, ఓటమిని అంగీకరించాలేమో అనిపించినప్పుడు, ప్రతిలిపి యాప్‌ను తెరిచి మీలో ఎవరో ఒకరి రచనను చదివేవాడిని. 

మీరు కేవలం కథలను ప్రచురించలేదు— లక్ష్యాన్ని చేరుకోగలనన్న నమ్మకాన్ని ఇచ్చారు. ఒక చిన్న ఆలోచనను స్టార్టప్‌గా, ఆ స్టార్టప్‌ను అతిపెద్ద ఉమ్మడి కుటుంబంగా మార్చారు.

ప్రతిలిపి అనే ఉమ్మడి కుటుంబంలో ఇంజినీర్లు, ప్రొడక్ట్ మేనేజర్లు, భాషను–సాహిత్యాన్ని ముందుకు నడిపే మేనేజర్లు, న్యాయవాదులు ఇలా అనేకమంది ఉన్నారు. అయితే ఈ ప్రయత్నాలన్నిటికీ ప్రాణం పోసింది, ప్రేరణనిచ్చింది మీలాంటి సృజనాత్మక రచయితలేనని వినయపూర్వకంగా తెలియజేస్తున్నాను.

కొత్త సంవత్సరంలో అడుగుపెడుతున్న ఈ శుభసందర్భంలో, మీకు తలవంచి నమస్కరిస్తున్నాను. మీ వల్లే ప్రతిలిపి ఈ స్థాయికి చేరింది. మీ వల్లే ఇంకా సుదీర్ఘ ప్రయాణం చేయగలమన్న కలతో ముందుకు సాగుతున్నాము.

సరస్వతి దేవి మీకు అపారమైన జ్ఞానం, విజయం ప్రసాదించాలని ప్రార్థిస్తున్నాను.

2026లో— మీ సృజనాత్మక శక్తి అంతులేని నదిలా ప్రవహించాలని కోరుకుంటున్నాను. పాఠకులు ప్రేమించే, అభిమానించే కొత్త రచనలతో వారి హృదయాలను మీరు గెలుచుకుంటారని నమ్ముతున్నాను.

మా ప్రయాణం లక్ష్యం వైపు ఇప్పుడే మొదలైంది! తరతరాలు గుర్తుపెట్టుకునే సంస్థగా ప్రతిలిపిని తీర్చిదిద్దేందుకు కృషి చేస్తున్నాము.

నా వ్యక్తిగత కల చాలా స్వార్థరహితమైనది: ఒక రచయిత జీవనోపాధి కోసం మరో ఉద్యోగం అవసరం లేకుండా, ప్రతిలిపిలో సంపాదించే ఆదాయంతోనే కుటుంబాన్ని పోషించే స్థాయికి చేరుకోవాలి.

మీరు రచించే అత్యంత విలువైన సాహిత్యమే మీ ఆర్థిక జీవితానికి పటిష్టమైన ఆధారంగా నిలవాలని, ప్రతిలిపి ద్వారా లభించే ఆదాయం మీకు సంపూర్ణ ఆర్థిక స్వేచ్ఛను అందించాలని హృదయపూర్వకంగా కోరుకుంటున్నాను.

మా ప్రయాణంలో కొన్ని లోపాలు ఉండొచ్చు. అయితే మీరు సాంకేతిక సమస్యల గురించి తెలిపినప్పుడు గానీ, ప్రతిలిపి యాప్ మరింత మెరుగుదల కోసం మీ అభిప్రాయాలను తెలియజేసినప్పుడు గానీ, మీ సూచనలను/సలహాలను శ్రద్ధతో స్వీకరిస్తున్నామని హామీ ఇస్తున్నాను. ప్రతిలిపి కుటుంబాన్ని మరింత సురక్షితంగా, పారదర్శకంగా, మీ నమ్మకానికి తగినట్లుగా తీర్చిదిద్దేందుకు మేము ప్రతిరోజూ కృషి చేస్తున్నాము. మీరు లేకపోతే మేము ఇక్కడ ఉండేవాళ్లం కాదన్న సత్యాన్ని మరోసారి వినమ్రంగా గుర్తు చేయదలుచుకున్నాను.

మీ ప్రయాణాన్ని మాతో పంచుకోవాలనుకున్నా లేదా మేమింకా మెరుగుపడటానికి మీ దగ్గర తగిన సూచనలు ఉన్నా, దయచేసి నన్ను గానీ లేదా మా బృందంలోని ఎవ్వరినైనా గానీ సంప్రదించండి. నేను ఎప్పుడూ [email protected]లో అందుబాటులో ఉంటాను. నేను నేరుగా మీకు సమాధానమిచ్చే సరైన వ్యక్తిని కాకపోయినా, సంబంధించిన టీంకి మీ సూచనలను పంపడం జరుగుతుంది. వారు తప్పకుండా మీకు సమాధానం ఇస్తారు.  

మీకు, మీ కుటుంబ సభ్యులకు నూతన సంవత్సర శుభాకాంక్షలు. మీరు సుఖసంతోషాలతో ఉండాలని భగవంతుడిని వేడుకుంటున్నాను. 

ప్రతిలిపిలో మీ విలువైన సాహిత్యాన్ని నిరంతరం ప్రచురిస్తూ ఉండాలని మనస్ఫూర్తిగా అభ్యర్థిస్తున్నాను.

కృతజ్ఞతలతో,

రంజీత్ ప్రతాప్ సింగ్,

ప్రతిలిపి C.E.O.